Árni: Skulu læsa kroatar inni

Árni Frederiksberg er fegin um, at hann gav landsliðnum ein møguleika afturat, tá Eyðun Klakstein gav honum kjansin tíðliga í ár.

KÍ-vongurin hevur í roynd og veru gjørt tað sama, sum hann hevur gjørt í Klaksvík í áravís. Hann er komin við eini rúgvu av sonevndum málstigum - málum og uppleggum - og eini turkatrúgv upp á, at Føroyar kunnu meir enn bara at vera við.

Í morgin trýr hann eisini upp á, at tað ber til at fáa stig, hóast tað er krútsterka kroatiska liðið, sum tekur ímóti í Rijeka. 

 - Um vit kanska klára at læsa kroatar inni í hasum búrinum aftanfyri málið, so kanska vit fáa eitt pent úrslit aftur í morgin, sigur hann og sipar til áskoðarapláss, sum eru væl og virðiliga innhegnað.

Árni Frederiksberg var einaferð við til at spæla javnleik ímóti júst kroatum. Tað var á U19-landsliðnum, men í morgin kann ein nýggjur javnleikur vera við til at spæla Føroyar til røkkstøkk-dyst um pláss í HM-endaspælinum næsta summar. 

Kravið er rætt og slætt, at Føroyar fáa fleiri stig enn kekkar, sum taka ímóti Gibraltar á heimavølli. Tann kjansurin kann tykjast lítil - tvær smáar sensatiónir sama dag - men Árni Frederiksberg heldur, at teir eiga at gera sítt.

 - Um vit hyggja at dystinum í Føroyum, verja vit ótrúliga væl. Tað er ikki so, at teir vassa í kjansum, minnir hann á.

 - Í mínari verð er tað væl møguligt at fáa stig í morgin og helst trý. Vit skulu bara vera skarpir í bæði verju- og kontraspælinum, eins og vit hava verið seinastu dystirnar.

Dysturin móti Kroatia byrjar klokkan 19.45 í morgin. Kringvarpið sendir beinleiðis eftir Dag og Viku.