- Stórt at Grønland var við 

Meðan stórpolitikkur verður umrøddur, fylgja grønlendingar við á síðulinjuni. Ein teirra er Nuka Eidesgaard, sum heldur tað vera ógvuliga kensluborið. - Tað, at Grønland var við á fundinum í Washington, hevur alt at siga. 

"Hetta er jú heimssøga", sigur hon brosandi, tá vit hitta hana heima í stovuni á Eiði. 

Undan fundinum í Washington í gjár, so var hon eitt sindur stúrin. "Bara tað ikki verður eitt Zelenskyj moment", sigur hon - og sipar til víðagitna fundin í Hvítu Húsunum millum ukrainska forsetan og Donald Trump. 

- Vit hava eisini eina rødd 

Søguligi fundurin í Washington var týdningarmikil, heldur Nuka Eidesgaard, tí umframt Lars Løkke Rasmussen, Marco Rubio og J.D. Vance, so var Vivian Motzfeldt við. 

"Eg haldi, at tað hevur alt at siga, at Grønland er við - og kann siga, hetta er okkara land, og tað er okkum, tit tosa um", sigur Nuka Eidesgaard, sum nú er meira bjartskygd enn áður. Har sær út til at vera meira samanhald millum Danmark og Grønland nú, heldur hon. 

Toppfundurin var viðgjørdur í Breddanum í dag, har millum annað var spurt, hvat veruliga kom burturúr. Øll sendingin kann hoyrast her: Breddin: Eftir fundin í Washington um Grønland