Dagsins maður um stuðulin: Vit mugu geva teimum alt aftur

 - Pauli, Pauli, Pauli, Pauli...

Rópini frá túsundtals føroyskum viðhaldsfólkum hoyrdust so hvørt sum liðskiparin, Pauli Jacobsen, hálaði eina bjarging fyri og aðra eftir upp úr hattinum í Unity Arena í Oslo.

Um føroyski málverjin ikki longu hevur skrivað undir við nýtt felag, so fær hann neyvan ilt við at fáa tilboð eftir heili 16 bjargingar upp á 37 montonegrinskar skotroyndir. Tað gav honum heiðurin sum dagsins maður hjá EHF.

 - Tað er púra svakt. Tú fært eyka orku og sjálvsálit, tá tú kemur inn her og sleppur at umboða eina tjóð, sum kemur allan vegin her til fyri at stuðla okkum. Vit føla, at vit mugu geva teimum alt aftur, sum vit kunnu, og tað er tað, vit royna á vøllinum allatíðina, segði Pauli Jacobsen eftir dystin.

Risastóru skjúttarnir hjá Montenegro skutu heili 40 mál ímóti Slovenia fríggjadagin, men teir fingu ikki góðar arbeiðsumstøður ímóti góða føroyska verju - og málmansspælinum, sum kanska var høvuðsorsøkin til søguliga EM-sigurin hjá Føroyum.

 - Vit vistu, at um vit fingu ein sigur, skuldi hann helst vera so stórur sum gjørligt, so møguleikarnir hjá okkum at koma víðari eru so góðir sum gjørligt. Tí høvdu vit allatíð tað í høvdinum, at um vit fingu momentum, skuldu vit píska tað allatíð og fara eftir at vinna so stórt sum gjørligt. Vit spæla ein konsentreraðamn og ekstremt góðan dyst, segði málverjin.

Tað eru neyvan fleiri meiningar um tað. Føroyar hava givið sær sjálvum góð kort á hondina undan síðsta umfari í bólkaspælinum týskvøldið, tá Slovenia er mótstøðulið.