- Vit vistu, at tað var dýrt, men at tað var so tungt, høvdu vit ikki roknað við. Tað siga tey bæði Nanna Falkvard Danberg og Eli Nolsøe Leifsson, sum eru flutt heim eftir loknan lesnað.

Tað kennist mest sum at renna aftaná eini málstriku, sum flytir seg, halda tey bæði, sum ikki síggja fyri sær, at koma á mál, um húsaprísirnir blíva við at vaksa so skjótt, sum teir gera nú.

Í sendingin verður hugt nærri at, hví húsini í Føroyum dýrka so skjótt, og hvat tað merkir fyri okkara útisetar, at tað er ringt at finna nakað til leigu til ein bíligan penga. Hvat ger tað við okkara ynski um at tekkjast ungu føroyingunum, sum eru farin undir útbúgving í útlegd? 

Lagt til rættis: Marjun Dalsgaard og Jógvan Eli Dam.