Nýggi Stapin vakti ans á Atlantic Fair

Meira enn 180 fyritøkur úr 14 londum eru við á messuni í ár, sum fyrstu ferð varð hildin undir navninum North Atlantic Fish Fair í 2001.

Messan hevur ment seg til eitt týdningarmikið stað hjá vinnulívinum kring Norðuratlantshavið.

Millum framsýnararnar á Atlantic Fair var modellið av nýggja Stapanum hjá Framherja-samtakinum víst fram, og tað vakti ans millum manna.

Talan er um eitt nýtt og framkomið línuskip, sum skal byggjast hjá norsku skipasmiðjuni Stadyard á Raudeberg uttanfyri Måløy. 

Nýggi Stapin verður 50,3 metrar langur, og fær eitt frystilastarrúm við plássi fyri 630 rúmmetrum. Sambært Stadyard er skipið serliga ment til línufiskiskap í Norðuratlantshavi, og fyri at tryggja høga góðsku á fiskinum.

Skrokkurin skal byggjast á Wisla Shipyard í Gdansk í Póllandi. Eftir ætlan kemur skrokkurin til Noregs síðst í 2027, har skipið síðani verður útgjørt og liðugt bygt, áðrenn tað verður latið Framherja árið eftir.

Hjá Stadyard fegnast tey um nýggju avtaluna við føroyska reiðaríið.

Rakstrarleiðarin á Stadyard, Trond Kongshaug, sigur, at tey eru errin av álítinum, sum føroyska reiðaríið vísir teimum við at leggja verkætlanina í Noreg.

Skipasmiðjan hevur eisini søgulig bond til Føroyar, tí 1975 bygdi Stadyard bil- og ferðafólkaferjuna Sam, sum framvegis er í sigling í Føroyum.