Kirkjubøur eigur at skipast betur

Tjóðsavnið varðar av øllum fornminnum i Føroyum. Tað sigur Herleif Hammer, stjóri í Tjóðsavninum. Hann sigur víðari, at harímillum eru fornminni í Kirkjubø nógv tey størstu, vit hava.

Fríggjadagin kom fram í Degi og viku, at tað nú kostar pengar at vitja garðin í Kirkjubø.

Stjórin í Tjóðsavninum vísir á, at tað er landið, sum varðveitir og heldur fornminnini í Kirkjubø.

- Vit hava havt eina stóra uppgávu tey síðstu 15 árini, kanska 20 árini, at gjørt Múrin í stand. Hann var í ringum standi ein yvirgang, men hann er nú umvældur, tað hevur landið raðfest.

- Tað, sum vit gera nú, tað er at halda Múrin, at halda fornminnini í Kirkjubø. Vit halda viðlíka, og vit verja, og vit skipa økið, vit miðla økið og skipa ferðsluna rundan um múrin og fornminnini sum eru har. Og soleiðis verða tey varðveitt.

Roynt at skipa økið
Onkur roynd hevur verið at skipa økið. Í 2024 var ein ætlan frammi, og eftir henni skuldi gamla fjósið umbyggjast til savn við matstovu og øðrum. Har skuldu eisini Kirkjubøstólarnir standa til framsýningar. Danski grunnurin Realdania By og Byg hevði játtað pengar til ætlanina.

Tíverri datt tann verkætlanin niðurfyri, sigur Herleif Hammer. Men hann heldur tó, at tað ber til at skipa økið kring fornminnini í Kirkjubø.

- Tað er kanska eitt sindur ógreitt, hvør kann gera hvat, og hvør hevur ábyrgdina av hvørjum. Vit hava ábyrgdina av, at fornminnini verða vard, og at tey halda sær frameftir, og at miðla tey til Føroya fólk og til onnur. Men júst, hvør kann taka pengar fyri hvat, og hevur Føroya fólk rætt til at ganga har ella ikki, og so víðari, tað eru nøkur viðurskifti, sum politiska skipanin og løgfrøðin má taka upp. Tað hava vit sum so einki við at gera. Vit royna bara at fáa viðurskiftini at virka rundan um fornminni, so tey hava tað gott, og so tey kunnu upplivast av okkara fólki.

Sí innslag úr Degi og viku og orðaskifti við gesti.