Ormurin Langi tók Havnarbátin í spurtinum

Tvídysturin millum Ormin Langa og Havnarbátin helt fram á fjarðastevnu.

Havnarbáturin vann á Norðoyastevnu, meðan Ormurin Langi fór við sigrinum á eystanstevnu og á jóansøku, og kappingin millum bátarnar var gróthørð í Vestmanna farna vikuskiftið.

Havnarbáturin fekk besta startin, og var fremstur stóran part av teininum, men Ormurin Langi helt høvdið kalt og yvirhálaði síðstu metrarnar við einum frálíkum endaspurti.

 - Vit trúgva somikið nógv upp á endaspurtin hjá okkum sjálvum og tað, at vit hava ein góðan endaspurt, so vit satsaðu upp á, at um vit gjørdu arbeiðið í miðróðrinum, so fingu vit endaspurtin, segði róðurskvinnan, Barbara Guðrunardóttir Højsted.

Tað eydnaðist hjá knørrabátinum, hóast ógvuliga lítið var ímillum bátarnar, sum komu um málið skot um skot. Aftur hesa ferð megnaði Klaksvíkingur ikki at bjóða av.