Løgmaður: Eg havi verið ov hampiligur

Ongantíð fyrr hevur løgmaður klárað seg so illa sum nú. Tað staðfestir nýggja veljarakanningin hjá Gallup.

Fólk vórðu spurd, hvussu væl tey halda, at løgmaður klárar seg samlað. Tey skuldu meta á einum stiga frá 1 til 10, har 1 er sera illa og 10 er framúrskarandi.

Karakterurin, sum løgmaður fær, er 4,3. Og hetta er tað ringasta úrslitið, sum løgmaður hevur fingið síðan apríl 2010, vísa tølini hjá Gallup.

Men søguliga lága skoðsmálið fær ikki løgmann at liggja í andvekri. Kaj Leo Holm Johannesen sigur tó, at hann ætlar sær at verða greiðari, tí hann eitt nú í tunnilsmálinum hevur latið sær ov nógv lynda.

- Eg havi verið ov hampiligur, sigur løgmaður.

Sí eisini Eygleiðari: Hevði væntað verri úrslit hjá Sambandsflokkinum

Sí eisini Kanning: Løgmaður ongantíð klárað seg so illa sum nú

Sí eisini Grafikkur:  Her er úrslitið av veljarakanningini