Uttanríkisráðharrin: Ongantíð aftur boykott

- ES-handilsstongsilin var eitt keðiligt mál, og vit eiga ongantíð at kom aftur í slíka støðu.

Tað sigur Martin Lidegaard, uttanríkisráðharri, sum er á vitjan í Føroyum.

Hann hevði tíðindafund í Tinganesi seinnapartin.

Martin Lidegaard sigur, at hann er fegin um, at ein loysn er funnin, tí eingin hevur fingið nakað burtur úr boykottinum - hvørki Danmark, ES ella Føroyar.

Uttanríkisráðharrin sigur, at av tí at ES-stongsilin hevur fylt so nógv í viðurskiftunum millum Danmark og Føroyar seinasta árið, hava stundir ikki verið til at viðgjørt føroyska ynskið um sjálvstøðugan limaskap í WTO, men hetta málið verður nú tikið uppaftur.

Hoyr samrøðu, sum Jákup Bogi Joensen gjørdi við Martin Lidegaard.

Meiri verður at frætta í útvarpstíðindunum og í Degi og Viku í kvøld.

Mynd: Martin Lidegaard, utttanríkisráðharri, á tíðindafundi í Tinganesi seinnapartin