Reiðarin: Vit skilja einki

Enn er eingin ákæra reist ímóti skiparanum á uppsjóvarskipinum, Christiani í Grótinum, sum í góð tvey samdøgur lá í Lerwick í Hetlandi.

Reiðaríið veitti í gjár trygd fyri umleið 200.000 kr., sum myndugleikarnir í Hetlandi kravdu, áðrenn skipið kundi loysa.

Christian í Grótinum er nú á veg til Føroya, og í dag verður kannað, um tey 300 tonsini av feskum makreli, sum eru í tangunum, kunnu seljast til matna, ella um tey mugu fara til ídnað.

Tað einasta, sum skiparin og manningin fingu at vita, var, at málið er útsett.

Tað sum hendi, er óskiljandi, sigur Kristian Martin Rasmussen, reiðari á Christiani í Grótinum.

Shetland News skrivar í kvøld, at skiparin á Christiani í Grótinum, Páll Klein Rasmussen, er ákærdur fyri brot á tvær ES-reglur. Onnur er um kemiska viðgerð av fiskinum, og hin er um, at fiskurin ikki verður frystur, so skjótt sum hann er skildur.

Málið kemur fyri í rættinum í Lerwick 9. desember.

Mynd: Kristian Martin Rasmussen, reiðari