FarGen: Føroyingar eiga rættin til upplýsingar

- Tað er umráðandi, at allar upplýsingar verða verandi á føroyskum hondum. Og eg dugi ikki at síggja annað enn, at føroyingar eiga rættin til allar upplýsingarnar.

Tað sigur Jens Godik Højen, leiðari fyri talgildu heilsuskipanina, nú kjakið um FarGen-verkætlanina er kyknað aftur.

Tíggju milliónir krónur verða játtaðar á donsku fíggjarlógini til FarGen-ætlanina, men tað ber ikki til hjá dønum ella øðrum at seta treytir við játtanini ella keypa sær rættindi til føroyskar upplýsingar - heldur ikki upplýsingar um arvastreingin, sigur Jens Godik Højen.