Set í verk eina null-hugsjón fyri laksalús

Stjórin í alifyritøkuni Luna vísti í vikuni á, at føroyska alivinnan er um at missa tamarhaldið á laksalúsini. Talið á kynsbúnum laksalús kom í desember upp á 38 milliónir - tvær ferðir so nógv sum árið fyri og fýra ferðir so nógv, sum fyri trimum árum síðan. Vøksturin hevur serliga verið stórur í heyst og vetur.

-Neyðugt er við nýggjum og strangari átøkum fyri at basa trupulleikanum, segði Atli Gregersen, stjóri í Luna. Peter Østergaard, djóralækni, er samdur at okkurt má gerast.

Enn er ógreitt, hvat stríðið móti laksalúsini kostar føroysku alifyritøkunum.

Niðurstøðan í einari nýggjar norskari frágreiðing er, at stríðið móti laksalús kostaði norsku alivinnuni útvið fimm milliardir krónur í fjør. Fýra krónur fyri hvørt kilo av laksi kostar tað at basa lýsnum, sambært frágreingingini hjá granskingarstovninum Nofima í Tromsø. Slík tøl eru ikki fyri føroysku alivinnuna.

Birna Mørkøre, landsdjóralækni, sigur at alarar hava í fleiri førum fingið álagt at slakta laks og hava eisini fingið boð um at lækka talið av smolti, sum verður sett út.