- Tíðindi, mentan og ítróttur
Kommunur vilja ikki tvingast at gjalda talgilding
Kommunurnar í Føroyum vilja ikki hava talgildu Føroyar og serstakliga kostnaðin av at talgilda Føroyar kroystan niður yvir seg.
Fyribils rokningin til kommunurnar er á 25 milliónir kr., býttar eftir fólkatalið í ymisku kommununum.
Tað kemur til sjóndar í fleiri hoyringarskrivum frá kommununum og Kommunufelagnum um lógaruppskotið.
Lógaruppskotið heimilar sum er Fíggjarmálaráðnum at taka gjaldið frá kommununum.
Misnøgd í Fuglafirði
Fuglafjarðar kommuna er millum atfinningarsomu kommunurnar.
Fuglafjarðar kommmuna skal rinda 770.000 kr. yvir trý ár fyri Talgildu Føroyar verkætlanina, verður hon samtykt.
Kommunan skrivar í hoyringarsvarið sinum, at hetta er sum at ognartaka kommunalan skattapening við lóg.
Fíggjarnevndin í Fuglafjarðar kommunu hevur viðgjørt málið, og hon heldur, at landið eigur at bera allan kostnaðin av verkætlanini. Síðani kunnu kommmunurnar koma uppí so hvørt og við at taka upp samráðingar við landið, skrivar Sonni í Horni, borgarstjóri.
Sonni í Horni fær eisini undirtøku frá Kommunufelagnum fyri sjónarmiði sínum.
Kommunufelagið tekur heilt yvirskipað undir við verkætlanini, men mótmælir staðiliga, at løgtingið við lóg ásetir, at kommunurnar skulu fíggja ítøkiligu verkætlanina.
Kommunurnar eru sjálvstøðugar politiskar eindir, sum hvør í sinum lagi avgera, hvørt tær ynskja at verða partur av verkætlanini, vísir Kommunufelagið á.
Í stuttari viðmerking, sigur Ruth Vang, forkvinna í Fíggjarnevndini, at bæði Kommununufelagið og landsstýriskvinnan í fíggjarmálum hava verið til hoyringar í Fíggjarnevndini.
Ruth Vang hevur góðar vónir um, at tað fer at eydnast kommununum og Kristinu Háfoss, landsstýriskvinnu, at finna ein fíggingarleist, sum báðir partarnir kunnu semjast um.
Tak niður
Sí eisini