Verkfall fráboðað í sjúkrahúsunum mánamorgunin

Tað stendur í botni í sáttmá-samráðingunum millum Felagið føroyskir djúkrarøktarfrøðingar og Lønardeildina í Fíggjarmálaráðnum.

Seinnapartin í gjár sendi Sjúkrarøktarfelagið eina fráboðan til Lønardeildina um, at arbeiðssteðgur verður lýstur fyri anestesi-sjúkrarøktarfrøðingarnar á øllum trimum sjúkrahúsunum mánamorgunin klokkan átta.

Talan er um okkurt um 16 fulltíðarstørv, upplýsir Óluva í Gong, forkvinna í Felagnum føroyskir sjúkrarøktarfrøðingar. 

Hon váttar, at felagið valdi ikki at senda boð eftir Semingsstovninum, men valdi í staðin at lýsa arbeiðssteðg alt fyri eitt at koma í gildi mánamorgunin.

Tá Starvsmannafelagið herfyri skrivaði undir sáttmála, sum gav limunum 695 kr. í lønarhækking um mánaðin fyrra árið og 754 kr. aftrat um mánaðin seinna árið, gjørdi Óluva í Gong greitt, at Sjúkrarøktarfrøðingafelagið fór ikki at góðtaka eina slíka lønarhækking.