Fara vónandi skjótt at differentiera elprísir

Sirið Stenberg, landsstýriskvinna í Umhvørvismálum, væntar, at uppskotið kemur fyri Løgtingið innan næstu vikurnar. Í løtuni er uppskotið til hoyringar.

Differentieringin í elprísum er ein av broytingunum, sum skulu fáa brúkarar at velja grønar orkukeldur, so Føroyar kunnu verða 100% grønar á landi í 2030.

SEV er til reiðar at taka í móti broytingini, sum fer at økja um inntøkurnar hjá SEV og bøta um raksturin, tá fleiri fólk velja grønu hitaskipanirnar. Nevndarformaðurin í SEV, John Zachariassen, vónar, at uppskotið kemur í gjøgnum skjótt.

Hann væntar, at hetta fær fleiri at leggja um frá olju til grøna hitaskipan, tí tað ger tað somikið áhugavert.

Sirið Stenberg, landsstýriskvinna vónar, at uppskotið fær undirtøku í Løgtinginum, tí tey eru øll samd um eitt orkuskifti, sum longu er í gongd.