Myllurnar í Porkeri ger mun

Eftirspurningurin eftir elorku í Suðuroynni var 14 prosent størri í fyrra hálvári í ár enn í fjør, upplýsir SEV.

Hetta er nógv meira enn eftirspurningurin í øllum landinum vaks, tí hann var bara trý prosent størri.

26 prosent frá myllunum

Og vindmyllurnar í Porkeri gera mun.

Tær gjørdu góð 26 prosent av streyminum, sum varð brúktur í Suðuroynni í fyrra hálvári.

Eingin samanbering er, tí myllurnar vóru ikki komnar í fyrra hálvári í fjør.  

65 prosent frá olju

Oljan stóð fyri 65 prosentum í Suðuroynni. Í fyrra hálvári í fjør var oljan 89 prosent.

Sólorkan í Sumba gav meira í ár enn í fjør. Vøksturin er góð 23 prosent.

Grøna orkan hjá SEV var í øllum landinum góð 40 prosent, - eitt vet meira enn í fyrra hálvári í fjør.