Jógvan Philbrow: Eingi undantøk

Leygardagin herðir Pedagogfelagið verkfallið, og allir limir í felagnum, sum starvast hjá Almannaverkinum og sjálvsognarstovnum hjá Almannaverkinum, fara í verkfall.

Stjórin í Almannaverkinum, Edvard Heen, segði við útvarpið í gjár, at Almannaverkið væntandi fer at biðja um undantak. 

SÍ EISINI: Almannaverkið biðjur um undantaksloyvi

Men Jógvan Philbrow, formaður í Føroya Pedagogfelag, sigur, at eingi undantøk verða givin.

- Vit hava ikki gjørt nakra avtalu um undaktøk í hesum førum, sigur Jógvan Philbrow og leggur afturat, at felagið ikki hevur móttikið umsóknir um undantøk enn. 

Undantøk geva onga meining

Harafturat sigur hann, at felagið ikki ætlar at geva hesi undantøk, um so verður, at felagið móttekur eina umsókn. 

- Tað gevur ikki meining at geva undantøk, tí so er eingin grund at fara í verkfall, sigur hann. 

- Eg vóni at Fíggjarmálaráðið skilir, at her er álvara í støðuni, og tað er so trupulleikin hjá Fíggjarmálaráðnum at syrgja fyri, at tingini ganga sum tey skulu, sigur Jógvan Philbrow um støðuna í løtuni.

Felagið hevur enn ikki tikið støðu til, um onnur tiltøk skulu setast í verk, sigur Jógvan Philbrow, formaður í Føroya Pedagogfelag.