Herða verkfallið leygarmorgunin

Sum nevnt, so verður lýst við verkfalli fyri limir í Pedagogfelagnum, sum arbeiða hjá Almannaverkinum og á sjálvsognarstovnum undir Almannaverkinum klokkan 8 leygarmorgunin.

Frammanundan eru leiðarar og varaleiðarar á sáttmálaøkinum hjá Pedagogfelagnum verkfalli, og í morgin hevur Kommunala arbeiðsgevarafelagið lýst verkbann fyri pedagogar og hjálparfólk á dagstovnum og frítíðarskúlum í kommununum. 

Annika Olsen, nevndarforkvinna í Kommunala Arbeiðsgevarafelanum sigur seinnapartin við in.fo, at tey eru klár at fara aftur til samráðingarborðið. 

- Dagin fyri, at vit boðaðu frá verkbanni, høvdu vit samband við Pedagogfelagið og heittu á tey um at koma aftur til samráðingarborðið. Tað vildu tey ikki tá, men tann áheitanin stendur enn við, sigur Annika Olsen við in.fo.