Búnaðargrunnurin strikar skuld á 39 mió.

Talan er um sera gomul lán, har lántakarin ongan møguleika hevur at gjalda aftur, sigur Regin Ingolfsson Jakobsen, stjóri í Búnaðargrunninum.

Útlitini til at fáa nakran pening inn aftur er ikki til staðar, sigur hann. Hetta er eisini orsøkin til, at Búnaðargrunnurin hevur uppgivið at krevja 39,7 milliónir krónur aftur, sum grunnurin hevur lænt út yvir eitt longri áramál.

Búnaðargrunnurin er ein peningastovnur, sum veitir lán til føroyska landbúnaðin. Hann virkar sum ein vanligur peningastovnur, og tað merkir, at festarin, ella bóndin sjálvur, heftir persónliga fyri lán, sum hann tekur.

Nú hevur Búnaðargrunnurin kortini valt at avskriva skuld fyri 39,7 milliónir krónur.

Men at avskriva skuld er ikki nakað, sum Búnaðargrunnurin lættliga fer í holt við, sigur Regin Jakobsen.

Tað skal við øðrum orðum vera púra vónleyst at fáa pengarnar aftur.

Hoyr samrøðu við Regin Jakobsen í brotinum omanfyri.