Helgi Dam Ziska vann talvkappingina í Klaksvík

Tað gjørdist greitt longu í gjár eftir áttanda sigurin á rað hjá honum í Small Nations-kappingini, sum er í Klaksvík. Helgi vann kappingina í 2016 í Luksemburg, og hevur nú endurvunnið hana ógvuliga sannførandi. 

Evropeisku smátjóðirnar, sum annaðhvørt ár kappast í talvi í Small Nations-høpi eru Luksemburg, Kýpros, Monako, Malta, Andorra, San Marino, Liktinstein, Jersey, Guernsey og Føroyar. 
Tíggju telvarar eru við í Small-Nations-kappingini fyri einstaklingar.

Seinasta umfar í kappingini byrjaði klokkan eitt í dag, har Helgi telvaði við svarta fólkinum móti stórmeistaranum Igor Efimov úr Monako, sum er nummar tvey. Talvið endaði fyri 10 minuttum síðani - tað endaði javnt. 

Støðan kl 14

Øll talv eru ikki liðug í dag, og støðan í kappingin er tí nú kl 14, at Helgi vinnur kappingina við 8½ stigi
Igor Efimov úr Monako er nummar tvey við 7 stigum 
og Fred Berend úr Luksemburg er nummar trý við 5½ stigi. 
Hin føroyski telvarin, Olaf Berg, er nummar fimm við 4 stigum.