Lønardeildin fegnast um úrskurðin

Stjórin á Lønardeildini hjá Fíggjarmálaráðnum fegnast um, at Fasti Gerðarættur hevur staðfest, at Semingsstovnurin fevnir um sáttmálaøkið hjá kommunulæknunum

- Vit eru bara fegin um, at málið er avgjørt, og at Semingsstovnurin er komin uppí, sigur Jan Mortensen, stjóri á Lønardeildini. 

Tað er greitt, at tað er langt millum partarnar í løtuni, men hóast hetta er stjórin á Lønardeildini bjartskygdur. 

- Tað hevur verið víst seg mangar ferðir fyrr, at hóast partarnir hava verið eitt fitt pettið frá hvørjum øðrum, so hevur tað eydnast at finna eina semju. So tað trúgva vit uppá, sigur Jan Mortensen, sum tó ikki vil gera viðmerkingar um, hvussu langt Lønardeildin er til reiðar at flyta seg í hesum málinum.

Fíggjarmálaráðið fekk viðhald

Fasti Gerðarættur gjørdi seint í gjárkvøldið av, at Semingsstovnurin eisini fevnir um sáttmálaøkið hjá kommunulæknunum.

Hetta merkir, at Fíggjarmálaráðið fekk viðhald í, at lógin um seming er galdandi fyri kommunulæknarnar, hóast teir royndu at grundgeva fyri, at sum sjálvstøðugir vinnurekandi, so vóru teir ikki fevndir av lógini um seming.

Fasti Gerðarættur sigur í sínum úrskurði, at:

- Fasti Gerðarrættur metir samanumtikið, at talan í hesum føri er um eina kollektiva áhugatrætu á føroyska arbeiðsmarknaðinum, og at Semingsstovnurin tí hevur heimild sambært semingslógini at fara undir semjing viðvíkjandi trætuni millum Kommunulæknafelag Føroya og Fíggjarmálaráðið í sambandi við, at Kommunulæknafelag Føroya hevur lýst verkfall fyri limir sínar.

Terje Sigurðsson, semingsmaður, sigur at hann fer at tosa við partarnar í dag.