Joanita og Dánjal eru eitt við tónleikin

Fyri seks árum síðani varð føroyski Dánjal Zachariassen giftur Joanitu úr Uganda. Saman eiga tey eina dóttur. Tey hittust í Danmark gjøgnum tónleikin og eru í dag samstarvsfelagar í tónleiki. Dánjal spælir trummur í bólkinum hjá Joanitu, umframt at hann er fyriskipari og umboðsmaður hjá henni.
Um vikuskiftið trína tey á pall í Føroyum. Júst nú er nýggja lagið hjá Joanitu "Kiwato" komið á ein "DJ top 10" hittlista í Uganda. Hetta hevur við sær, at tey fara til Uganda at spæla konsertir í næstum. Dánjal hevur ongantíð verið í Uganda, eftirsum hann hitti Joanitu í Danmark, har hon hevur búð, síðani hon var barn - og har búleikast tey í dag sum familja.
Foreldrini hjá Joanitu eru úr Uganda, men hóast tað tosar hon ikki so væl sítt móðirmál, sum er "Luganda", ið er annað høvuðsmálið í Uganda við síðuna av enskum. Men kortini syngur hon á hesum máli.
Joanita sigur seg vera kritiska, tá tað snýr seg um trummusláarar í sínum bólki. Dánjal, sum er trummusláarari í bólkinum, sigur, at hann er um at finna tað serliga afrikanska rútmiska stevið, sum hann so blandar við sínum amerikanska / vesturlendska spæli. Vikuskiftissendingin hitt tey bæði til eitt prát ein fagran dag uttanfyri Norðurlandahúsið