Heldur stimbra mentan hjá børnum enn skrivstovur

Tað er púra burturvið, at meirilutin í Tórshavnar býráð nú ætlar at brúka fjórðu hæddina á Býarbókasavninum til kommunalar skrivstovur heldur enn til barna- og ungdómsdeild., heldur Helena Dam á Neystabø, býráðslimur fyri Javnaðarflokkin, sum er í minnilutanum í býráðnum.

Býarbókavørðurin í Havn seinastu seks árini, Arnbjørn Ó. Dalsgarð, boðaði í síðstu viku frá, at hann gevst í starvinum hálvan juni, tí hann ætlar at arbeiða hjá sær sjálvum, millum annað skriva. 
Men hann segði eisini, at um- og útbyggingarætlanin hjá Býarbókasavninum er ein orsøk til uppsøgnina. Millum annað tað, at kommunan nú sjálv skal brúka ovastu hæddina í bygninginum, sum Býarbókasavnið er í.