Suðuroyardialektin í vanda fyri at hvørva

Suðuroyardialektin er ein av okkara sermerktu lokalu dialektum. Men, suðuroyardialektin er undir trýsti og kann vikna.

Tað vísir ein kanning, sum Rakul Skaale Andreasen á Føroyamálsdeildini á Fróðskaparsetrinum hevur gjørt. Hon hevur kannað málførið hjá ungum suðuroyingum í aldrinum 17-21.

Hon bað tey lurta eftir orðum og setningum á suðuroyarmálføri og á miðstaðarmálføri og bað tey svara, hvat av málførinum ljóðar eitt nú meira álítandi, modernað og áhugavert. Úrslitið vakti ans.

- Úrslitini benda á, at suðuroyarmálførið kann vikna. Til dømis er on-endingin ikki væl dámd. Tað bendir á, at tey ungu fara brúka in-endingina í framtíðini, sigur Rakul Skaale Andreasen millum annað um úrslitini frá kanningini.

Kanningin varð gjørd í tveimum. Ein ótilvitaður partur, har tey spurdu ikki vistu áðrenn, at teirra málføri bleiv kannað, og ein tilvitaður partur, har tey spurdu vistu áðrenn, at teirra málføri bleiv kannað. Har vísti tað seg, at ein munur er á svarunum.

Júst tað, at teir ungu suðuroyingarnir svaraðu, at teimum dámdi betur suðuroyarmálførið, tá teir vórðu tilvitaðir um tað, kann verða ein ábending um, at teir eru góðir við sína dialekt, og harvið er kanska gróðrarbotnur fyri henni alíkavæl.

- Man má hugsa um, at tann ótilvitaði hugburðurin er ein sterkari og sannari mynd av veruligu støðuni. Men tað, at ein er góður við sítt mál, hevur eisini nakað at siga í varðveitingini av málinum, sigur Rakul Skaale Andreasen.