Dálkandi verkætlan umhvørvisgóðkend

Nes Kommuna hevur fingið góðkenning til at brúka grót úr Eysturoyartunnilinum til at leingja verjugarðin við havnina, hóast hetta kann merkja, at nógv plast frá spreingiløðingum endar á sjónum.

Umhvørvisstovan hevur ikki heimild at steðga verkætlanum sum hesari, men krøvini til upprudding verða herd so við og við, sigur Ingvard Fjallstein, umhvørvisviðgeri á Umhvørvisstovuni.

Leingja verjugarðin

Nes kommuna hevur fingið góðkenning frá Umhvørvisstovuni at leingja verjugarðin við havnina 90 metrar við gróti úr Eysturoyartunlinum. 

Trupulleikin er, at nógv plast er í grótinum, sum væntandi fer á sjógv. Mett verður, at umleið 31,5 til 56 kilometrar av spreingileidningum verða fluttir við, og at størsti parturin av hesum fer á sjógv. 

- Umhvørvisstovan kann altíð krevja upplýsingar um virksemi, sum viðvíkja góðkenningina, sigur Ingvard Fjallstein, umhvørvisviðgeri á Umhvørvisstovuni.

Tað merkir, at Umhvørvisstovan til eina og hvørja tíð kann fylgja við og hyggja eftir, um góðkenningin verður fylgd.

Herða krøvini hvørja ferð

Plasti, sum fer á sjógv, er dálkandi, men Umhvøsvisstovan hevur ikki heimild at steðga slíkum verkætlanum. 

- Grunleggjandi er tað ikki rætt at koyra hetta grótið á sjógv. Men nú er ein verkætlan í gongd, Eysturoyartunnilin, sum kostar eina milliard, har ætlanin allatíð hevur verið, at grótið skal brúkast til útfyllingar, sigur hann. 

Tað er heldur ikki ásett í løgtingslógini um umhvørvisvernd, at slíkar verkætlanir skulu hava umhvørvisgóðkenning.

Í fylgiskjalinum til lógina stendur, at undantøk eru, og tá kann umhvørvisstovan áseta krøv. Og fleiri og fleiri krøv verða sett, og sostatt verður dálkingin tálmað.

Hoyr Ingvard Fjallstein, umhvørvisviðgeri á Umhvørvisstovuni, greiða frá í ljóðbrotinum omanfyri.