Internet umborð á Atlantic-flogførum

Seinni í ár fáa ferðafólk hjá Atlantsflogi eftir ætlan møguleika at fara á internetið, meðan tey flúgva.

Talan er um nýggja tøkni, sum verður royndarkoyrd umborð á flogførunum hjá Atlantsflogi.

- Vit vóna, at tað, sum fer at henda í ár longu, tað er, at man hevur samband umborð á flogfarinum, sum næstan hevur verið einasta staðið, har man ikki hevur samband, sigur Árni Olsen, marknaðarleiðari í Atlantic Airways. 

Talan er um nýggja tøkni, sum ger, at tað ikki er neyðugt við nýggjum antennum og øðrum, og tískil verður ferðaseðlaprísurin eiheldur ávirkaður. 

Frameftir kunnu ferðandi hjá Atlantsflog sostatt gleðast um at kunna vera á internetinum, tá flogið verður.

Sambært Árna Olsen er talan um eitt sokallað "low-bandwidth"-samband. Tað merkir, at kundar til dømis ikki kunnu stroyma beinleiðis og surfa á netinum, men ferðandi fáa samband til internetið, og hjá Atlantic Airways vænta tey, at hetta fer at nøkta tørvin hjá kundunum.  

Hoyr samrøðu omanfyri.