Skúladagurin er ov langur og ov bókligur

- Eg haldi, at skúladagurin í føroyska fólkaskúlanum er ov langur. Vansin er, at næmingarnar verða troyttir, sigur Regin Marnersson, sum er skúlastjóri í Skúlanum á Fløtum í Havn.

- Og eg haldi eisini, at skúladagurin í føroyska fólkaskúlanum er ov bókligur. Tað er ov lítil rúmd fyri tí handaliga, skoytir hann uppí.

Landsstýriskvinnan í mentamálum hevur lagt upp til eitt orðaskifti um føroyska fólkaskúlan. Skúlastjórar halda, at skúladagarnir eru ov langir, og tað er ein bági fyri hugin hjá børnunum at læra.

Landsstýriskvinnan vil hava útgreinað, um kravda tímatalið hjá øllum árgangum skal lækka tveir tímar um vikuna.

- Tveir tímar er eitt ov lítið stig, heldur Regin Marnersson.

Føroysk børn eru eisini longri í skúla enn børn í hinum norðanlondunum, uttan í Danmark.

Í Føroyum eru eisini kravdir máltímar, og væl færri listatímar enn í hinum norðanlondunum.