Omaná valkvøldið

Valkvøld eru sum oftast merkt av góðum hýri, vælsmakkandi mati og annars familjuhugna.

Jákup Sumberg, høvuðskokkar á nýggju matstovuni Hallartún, vitjaði Gunnar Nolsøe og Leif Láadal í útvarpsstovuni við einari vælsmakkandi dessert, sum bæði er løtt at gera og smakkar sera væl.

Tilfar: 

• Sukur
• 2 nelikar
• 1 kanelstong
• 4-5 dl appelsindjús
• Ananas
• Ristað kokus (pynt)
• Vaniljuís ella vaniljukrem (afturvið)
• Møguliga saft frá einari sitrón

Mannagongd:

Stoyt sukur á eina heita pannu, stoyt so mikið nógv, at pannan er dekkað.

Bíða til sukurið smeltar.

Koyr nelikar og kanelstongina í og stoyt appelsindjúsið omanyvir.

Kóka síðani upp.

Flys ananasið og sker í fýra bitar. Legg hesar í eitt ovnfast fat og stoyt lakan omaná.

Koyr lok/silvurpappír á fatið og stilla síðani í ovnin á 150 hitastig.

Sting steikinál ella knív í ananasið. Tá ananasið er bleytt eins og eitt kókað epli, er klárt at taka úr ovninum.

Smakka møguliga til við sitrón.

Koyr ananasið á ein tallerk, stoyt lakan omaná og pynta við snerktum kokosið og vaniljuísi ella vaniljukremið.

Um tær tørvar meira nágreiniliga vegleiðing, kanst tú lurta eftir samrøðuni omanfyri, har Jákup greiðir nærri frá, hvussu tú gert lekru dessertina.