Smittað starvsfólk fór beint til arbeiðis

Eitt starvsfólk í sjúkrahúsverki fekk leygardagin staðfest koronusmittuna. Starvsfólkið kom aftur til Føroya seinasta mánadag, og fór beint aftur til arbeiðis týsdagin.

Sostatt hevði starvsfólkið verið til arbeiðis í sjúkrahúsverkinum í fleiri dagar, tá viðkomandi fekk staðfest koronusmittuna leygardagin.

Sambært mannagongdini hjá sjúkrahúsverkinum, skulu starvsfólkini í minsta lagi halda seg heima, til úrslitið frá royndini sætta dagin er klárt.

– Mannagongdirnar hjá okkum eru ikki hildnar, er tað stutta svarið, sigur Margit Stórá, varastjóri á Landssjúkrahúsinum.