Norðurlandahúsið einki útlit til størri játtan

Norðurlendska Ráðharraráðið arbeiðir framímóti, at Norðurlond skulu verða mest burðadygga økið í heiminum í 2030.

Tí verða sparingar framdar á mentanarøkinum og á útbúgvingarøkinum fyri at hava pening til grøna orkuskiftið.

Sparitiltøkini raka Norðurlandahúsini, og Norðurlandahúsið í Føroyum skal spara tríggjar milliónir í fýra ár.

Jenis hevur mótmælt

Jenis av Rana, landsstýrismaður í mentamálum, sigur, at hann í fleiri umførum hevur roynt at sannført Norðurlendska Ráðharraráðið um ikki at fremja so ógvusligar sparingar.

Gunn Hernes, stjóri í Norðurlandahúsinum í Føroyum, sigur, at sparingin fer at raka virksemið í húsinum, og helst mugu færri tiltøk haldast.

Almennu Føroyar lata 1,7 millión til Norðurlandahúsið, og Gunn Hernes sigur, at ein stórur partur verður brúktur til viðlíkahald.

Fara at venda sær til politikararnar

Norðurlandahúsið fer helst at venda sær til politikarnar um fleiri pengar.

Jenis av Rana harmast um, at ein møgulig sparing kann raka viðlíkahaldið av Norðurlandahúsinum. Almnennir bygningar eru ofta ikki væl hildnir, og har er Norðurlandahúsið eitt undantak.

Men Jenis av Rana kann ikki lova, at Norðurlandahúsið fær størri játtan.