Landslæknin biður um hjálp úr Danmark at smittuspora

So mikið stórt trýst er nú á Landslæknastovninum, at landslæknin hevur tørv á tíggju fólkum afturat til smittusporing.

Tí hava landslæknin og fútin í felag biðið Den nationale operative stab í Danmark um hjálp til Landslæknastovnin í Føroyum.

Væntandi verður talan um fólk frá donsku heimaverjuni.

Stendur á at ringja til smittað

Sambært Lars Fodgaard Møller, landslækna, stendur í løtuni á at ringja til tey, ið eru smittað.

Støðan er kritisk, og tí er neyðugt at fáa útbúgvið fólk innan smittusporing. Tey eru ikki í Føroyum, men í Danmark, sigur Michael Boolsen, fúti.

"Vit vilja gjarna hava fólk, sum kunnu fara beint til verka, og fólk við tí serkunnleikanum finnast ikki í Føroyum í løtuni."