Fútin: "Grindafólk mugu eisini duga at sissa seg"

Tað er ein grundleggjandi misskiljing millum uppgávurnar hjá politinum og grindamonnunum. 

Tað sigur Michael Boolsen, fúti, í sambandi við, at Grindamannafelagið finst hvassliga at donsku myndugleikunum, tí teir óbeinleiðis góðkenna tað virksemi, aktivistarnir gera.

umhvørvis felagsskapir, Sea Shepherd, grindadráp, ferðafólk

Mynd: Bjarni Árting Rubeksen

Esmar Joensen, formaðurin í Grindamannafelagnum, sigur, at meðan grindafólk skulu til avhoyringar, hvørja ferð aktivistar melda grindafólk, fær tað ongar avleiðingar fyri aktivistar, at teir bróta lógina.

Sum dømi nevnir hann, at dronur flúgva yvir grindaøkjum og aktivistar fara inn um avbyrgd grindaøki, uttan at nakað hendir.

Eisini nevnir hann dømi um, at politiið undir grindadrápi hevur staðið beint við, tá ið aktivistar hava framt sítt virksemi.

 

grindadráp (mynd: Bjarni/KVF)

Mynd: Bjarni Árting Rubeksen

Lurta eisini eftir: Grindamannafelagið: Grindafólk kenna seg svikin av Danmark

Mugu práta saman í nýggja árinum

Michael Boolsen, fúti, er als ikki samdur við formannin í Grindamannafelagnum um, at løgreglan tekur meldini frá aktivistum fyri fult, so grindafólk skulu avhoyrast, men ger einki við, at aktivistar bróta lógina við dronum og øðrum, tá ið grind verður hildin til.

"Eg haldi, at vit mugu taka eitt prát við Grindamannafelagið, fyri at finna út av, hví vit ikki skilja uppgávurnar hjá hvørjum øðrum," sigur Michael Boolsen, fúti, sum fer at kalla til fundar fyrst í nýggja árinum.