Svínoyingar undrast á tilmælini hjá SSL

Óli Andrias Reinert á Geilini er ein av teimum 31 fólkunum, sum, sambært Hagstovuni, búgva í Svínoy.

Hann undrast stórliga á nýggju tilmælini frá Strandfaraskipum Landsins, sum mæla børnum og eldri fólkum frá at sigla við farleiðini hjá Rituni millum Hvannasund, Svínoy og Fugloy, tá vindmegin er oman fyri 10 m/s.

Við útvarpið sigur Heri Norðberg, trygdarsamskipari hjá Strandferðsluni, at tilmælini fyrst og fremst eru ætla ferðafólkum, sum ikki eru von við at sigla á farleiðini.

At tað er neyðugt at upplýsa summi ferðafólk um líkindini á farleiðini, skilir Óli Andrias Reinert á Geilini, men hann metir, at tað er skeivt einans at gera tað út frá miðalvindinum.

Tí sambært Andriasi, er vindurin ikki tað, sum hevur mest at siga fyri, hvussu líkindini eru í Svínoy.