Ov vánaligt at útbjóðingartilfar hjá Runavíkar kommunu er ov ógreitt

Tað er ov vánaligt, at triðstørsta kommuna í landinum ikki megnar at gera greitt útbjóðingartilfar í sambandi við gerð av svimjihøll í Runavík.

Atfinnandi orðini eigur Sonni L. Petersen, býráðslimur í Runavíkar kommmunu.

- Nú sigur borgarstjórin, at arbeitt verður við onkrari ætlan, sum hann tó ikki vil kunna um. Vit hava brúk fyri opinleika, sigur Sonni L. Petersen.

Eingin bjóðaði

8. november í fjør - bara nakrar tímar fyri at freistin var farin at lata tilboð inn at gera nýggju svimjihøllina í Runavík - skrivaði Føroya Handverksmeistarafelag til Runavíkar kommunu og segði, at eingin av teimum trimum áhugaðu fyritøkunum fóru at bjóða.

Tórbjørn Jacobsen, borgarstjóri í Runavíkar kommunu, vildi ikki gera bandaða samrøðu við útvarpið, men hann segði í stuttari viðmerking, at arbeitt verður við einari loysn, og at kommunan samskiftir við onkran.

Als ikki nøktandi

Sonni L. Petersen er als ikki nøgdur og heldur, at tað manglar opinleiki.

Hann heldur, at borgarin má kunnast um støðuna, tí at kommunan longu hevur nýtt 10 til 12 milliónir krónur upp á verkætlanina.

Sum býráðslimur heldur hann, at borgarstjórin má kunna um, hvat skattapeningurin verður nýttur til, og hvat kommunan nú ætlar at gera