LISA: Listafólk kenna seg svikin av landsstýrinum

Løgtingið skal í næstum viðgera hjálparpakkan til listafólk, sum Jenis av Rana, landsstýrismaður í mentamálum, hevur borið í tingið. Hjálparpakkin er galdandi frá 9. desember 2021 til 31. januar 2022, og er hann áljóðandi 600.000 krónur. Men tað er ov lítið og ov stutt tíðarskeið, heldur Listafólkasamband Føroya, LISA. 

Sambært metingum hjá LISA, hevur listaøkið mist millum 3.9 milliónir og 4.3 milliónir krónur í mistum inntøkum, siðani seinasti hjálparpakki gekk út 1. mai 2021.

- Fyri summi listafólk hevur koronatíðin gjørt, at tey liva í sosialari neyð. Nógv hava mist stóran part av sínari ársinntøku, og tá skal man hugsa um, at ársinntøkan hjá listafólki frammanundan er í lægra endanum, sigur Marita S. Dalsgaard. 

Hon heitir tí á landsstýrið og løgtingið um at taka teirra neyðarróp til sín. 

- Eg vil innarliga heita á politikararnar, um at finna hasar pengarnar, sum skulu til, fyri at geva listafólk eina veruliga hjálpandi hond á tí fíggjarliga økinum, sigur hon.