Føroyingar fáa talgilt koyrikort

Tað kostar einum bilførara 700 krónur í sekt, um hann verður tikin av løgregluni og ikki hevur koyrikortið við í bilinum. Men innan eitt ár verður tað væntandi møguligt hjá føroyingum at fáa sær talgilt koyrikort. Fígging er fingin til vega, so nú kann arbeiðið loksins byrja, sigur Nicolai Mohr Balle, verkætlanarstjóri í Talgildu Føroyum.

Í løtuni sigur lógin greitt, at bilførarar skulu vísa fysiska koyrikortið, tá ið politiið biður um hetta. Men ein broyting í grein 18 í ferðslulógini fer at loyva fólki at brúka talgilt koyrikort ístaðin. 

Tað er Talgildu Føroyar, sum hava ment samleikan og vangan, men talgilda koyrikortið og borgarakortið verða tó ikki partur av Vanganum.

Á fíggjarlógini fyri 2022 var nakað av peningi settur av til at menna tað talgilda koyrikortið. Men tá tað kom til stykkis, var fíggingin tikin av aftur fíggjarlógini. Hetta ávirkar tó ikki verkætlanina, sigur Nicolai Mohr Balle.

Hoyr verkætlanarstjóran greiða frá nýggja talgilta koyrikortinum og borgarakortinum í innslagnum.