200 ukrainsk flóttafólk verða roknað sum føroyingar

Upp í 200 flóttafólk úr Ukraina fáa nú serstakt og fyribils uppihaldsloyvi í Føroyum í tvey ár.

Tað stendur í uppskotinum til ríkislógartilmælið, sum løgtingið fer at viðgera í dag.

Hoyr samrøðu við Magnus Rasmussen, landsstýrismann, í útvarpstíðindunum.

Enn er onki samlað yvirlit yvir ukrainsk flóttafólk í Føroyum, tí enn eru tey at meta sum ferðafólk, siga tey á Útlendingastovuni.

Hjá Reyða Krossi í Føroyum hava tey heldur einki fullfíggjað yvirlit, men tey vita um umleið 40 fólk úr Ukraina, sum eru komin til Føroya, síðani kríggi byrjaði 24. februar.

Uppskotið til ríkislógartilmæli kemur til viðgerðar á tingfundinum, sum byrjar nú kl. 13, og tingið hevur longu samtykt at víkja frá tíðarfreistunum í hesum málinum.