Jóannes Eidesgaard spældi týðandi leiklut

Ein av týdningarmestu politikarunum í danskari søgu, Uffe Ellemann-Jensen, er deyður eftir langa sjúkralegu, 80 ára gamal.

Uffe Ellemann-Jensen var formaður í Vinstra-flokkinum í fjúrtan ár, og man vera best kendur sum danskur uttanríkisráðhari frá 1982 til 1993 í stjórnini hjá Poul Schluter.

Eftir at hann fór úr politikki í 2001, var hann íðin politiskur viðmerkjari líka til tað síðsta og tók millum annað lut í kjakinum um donsku verjufyrivarnini, sum vóru til fólkaatkvøðu herfyri.

Hann gjørdist ongantíð forsætisráðharri, hóast tað var líka við í 1998, tá hann tapti móti Poul Nyrup Rasmussen og donsku sosialdemokratunum. Tað var millum annað valið í Føroyum sum gjørdi, at hann ikki vann ta ferðina. Stutt eftir fór hann frá sum formaður og Anders Fogh Rasmussen tók við leiðsluni í Vinstra-flokkinum.

Minningarorð
Edmund Joensen, fólkatingsmaður fyri Sambandsflokkin, og fyrrverandi løgmaður, skrivar eisini ídag minningarorð um Uffe Ellemann Jensen. Hann samanber hann við mætar statsmenn sum Helmuth Kohl og Michael Gorbatjov. Sum løgmaður í kreppuárunum í 90-unum, hevði Edmund Joensen ynskt sær Uffe Ellemann Jensen sum forsætisráðharra.
Edmund Joensen skrivar millum annað.

- Eg tori væl at siga, at orrustan millum Danmark og Føroyar í krepputíðini hevði sæð øðrvísi og betri út, um Uffe hevði sitið við róðrið í Danmark. Bæði tí hann var Føroyavinur, men eisini tí hann hevði neyðugu fatanina av tí sárbæru, trilvandi, politisku støðuni hjá lítla samfelagnum Føroyum, týdninginum av áliti millum londini og týdninginum av samlaðu strategisku støðu ríkisins, skrivar Edmund Joensen millum annað.