Minningardagur teirra deyðu í ferðsluni

Henda dag steðga vit á og minnast tey, sum doyðu í ferðsluni og tey, sum liva við missinum, og bæði í kirkjum og samkomum verður evnið stundum tikið upp hendan dag.

Mest sjónligur er hesin dagur við teimum mongu blómutyssunum, ið eru at síggja fram við vegunum kring landið - á støðum, har ferðslan hevur kravt mannalív.

Eftir fleiri ár við søguliga lágum deyðstølum í ferðsluni - harav tvey ár við ongari deyðsvanlukku - hevur ein deyðsvanlukka verið síðani seinasta minningardagin. Hon hendi í desember í fjør, tá ein 12 ára gomul genta doyði í vanlukku á landsvegnum við Norðskála.

Tað er Ingi Gunnarsson, sum í 2000 av sínum eintingum tók stig til blómutyssini, og hann samskipar framvegis tiltaki í sambandi við onnur sjálvboðin. Hartil kemur, at Ráðið fyri Ferðslutrygd, fyritøkur og einstaklingar stuðla tiltakinum.

– Men hugskotið ella tankin aftan fyri er nógv eldri enn so, sigur Ingi Gunnarsson.