Summarveðrið ómetaliga óstøðugt

Vit skriva 12. juli, og tað er hásummar. Men í nátt og í morgun bar av. Millum annað vóru máldir 44 sekundmetrar um Norðradalsskarð og heilir 54 sekundmetrar um Øðradalsskarð.

Tað er ikki ov nógv sagt, at veðrið seinastu tíðina í hásummartíð hevur verið ómetaliga óstøðugt og vánaligt. Og sambært Andriasi Klein Gregoriussen, veðurfrøðingi á veðurstøðini, kemst hetta av mongu lágtrýstunum, sum ferðast rundan um okkum í Norðuratlantshavinum.

- Í stuttum snýr tað seg um, at sera nógv lágtrýst eru komin hendan vegin. Tað hevur nakað at siga, akkurát hvar lágtrýstini hava ferðast her í Norðuratlantshavinum, sigur Andrias Klein Gregorisussen.

Ikki óvæntað veður

Hóast keðiliga summarveðrið helst er óvæntað fyri flestu føroyingar, so kemur tað ikki heilt óvæntað á veðurfrøðingin.

- Langtíðarforsagnirnar hava í eina tíð boðað frá, at norðurevropeiska økið í summar fór mest at vera ávirkað av nógvum lágtrýstum, og at vit tí skuldu vænta meira regn enn vanligt. Hinvegin hevur meginlandið verið ávirkað av nógvum hátrýstum, har veðrið hevur verið heitari enn vanligt, sigur Andrias Klein Gregoriussen. 

Eitt annað, sum hevur ávirkað summarveðrið, er tað, sum veðurfrøðingar rópa El niño-fyribrigdið, har kaldir streymar hava ligið við eystara partin av Kyrrahavinum út fyri Suðuramerika. Og eisini nógvi vindurin kemur sambært veðurfrøðinginum frá mongu lágtrýstunum. 

Ov tíðliga at siga nakað um ólavsøkuna

Sambært veðurfrøðinginum sær tað út til, at avfallið fer at halda fram eina tíð afturat. Tó kunnu vera onkrar góðar vikur í august, sigur Andrias Klein Gregoriussen, sum tó ikki torir at koma við veðurforsøgnum fyri ólavsøkuna. 

- Tá vit gera langtíðarveðurforsøgnir, so tosa vit um miðaltøl. Um hvussu veðrið sær út í miðal fyri eitt ávíst tíðarskeið. Tá vit skulu hyggja eftir einstøku døgunum, tá er torført at spáa, um veðrið longur fram enn fimm dagar, sigur Andrias Klein Gregoriussen. 

Hoyr Andrias Klein Gregoriussen greiða frá í ljóðbrotinum omanfyri.