Fyrimunur fyri børnini - vansi fyri samfelagið

Nú verður arbeitt við at broyta dagstovnalógina, so heimilað verður kommunum at rinda part av kostnaðinum fyri stovnspláss til foreldur, um tey velja at ansa egnum børnum heima.

Tað er ein partur av persónliga frælsinum hjá foreldrum at kunna velja, hvussu nógva tíð tey brúka saman við barninum, sigur Súsanna Olsen stjórnmálafrøðingur.

Hon heldur ikki, at betri møguleikar at ansa børnunum heima fara at halda kvinnum føstum í siðbundnu kynsleiklutunum.

Tað eru bæði fyrimunir og vansar, um foreldur eru meira heima og ansa sínum børnum. Fyri børnini er hetta avgjørt ein fyrimunur, sigur Súsanna Olsen.

Tað er eitt vaksandi rák hjá foreldrum at vera meira heima hjá smáu børnunum. Í Svøríki verða 30 prosent av børnum yngri enn trý ár ansað heima. Og tað eru eisini ávísir samfelagsligir fyrimunir við uppskotinum sigur Súsanna.