Stýrisformaðurin á Setrinum: 30 mió. kr. er ein kærkomin byrjan

Næstu árini skulu brúkast 30 milliónir krónur um árið til at høvuðsumvæla gamla Venjingarskúlan í Havn til eitt universitetskampus til Fróðskaparsetrið.

Ætlanin er at landið yvirtekur ognarlutin hjá Tórshavnar Kommunu í Venjingarskúlanum móti, at kommunan yvirtekur partar av bygningunum, har Studentaskúlin í Hoydølum helt til, umframt partar av
lendinum á økinum.

Fróðskaparsetrið skal síðani stigvíst flyta úr leigumálinum í Sjóvinnuhúsinum, soleiðis at alt virksemi er flutt úr Sjóvinnuhúsinum í seinasta lagi tann 31. desember 2024.

Fleiri hundrað mió. skulu til

Í fíggjarlógaruppskotinum fyri 2023 eru játtaðar 30 milliónir til høvuðsumvælingina. 

30 mió kr um árið, næstu fimm árini, eru ein kærkomin byrjan, til at at umvæla gamla Venjingarskúlan og savna Fróðskaparsetur Føroya á Frælsinum.

Men fleiri hundrað milliónir aftrat skulu til, áðrenn alt Setrið kann samlast undir somu tekju, sigur Ólavur Ellefsen, stýrisformaður fyri Fróðskaparsetur Føroya.