Veðrið argar alla ferðslu

Framvegis er nógvur kavi kring alt landið, og aftur í dag verður sagt frá, at vegirnir eru hálir, so fólk mugu ansa sær í ferðsluni.

– Maskinurnar hjá Landsverki vóru í gongd til seint í gjárkvøldið og tørnaðu til aftur tíðliga í morgun, og tað hevur bøtt munandi um koyrilíkindini, sigur Árni Jacobsen, økisleiðari hjá Landsverki.

Eisini samferðslan er ávirkað av veðrinum, so nógvar seinkingar, avlýsingar og broytingar eru í ferðaætlanunum hjá bæði Bygdaleiðum og Strandferðsluni.

– Tað er ikki óhugsandi, at enn fleiri seinkingar og avlýsingar koma, sum tað líður út á dagin, sigur Jonhild Andreasen á Strandferðsluni.