Verjir psykiatrilógin veruliga?

Føroyar hava enn einki talsfólk ella brekumboð, ið hevur skipað eftirlit við brekrættindum. Millum annað tað vísir MEGD á í hoyringssvari til landsstýrið, sum ummælir nýggja ríkislógartilmælið til lógarbroytingar í sambandi við noyðslu í psykiatriini.

- Hvussu kunnu vit vita, um lógin veruliga verjir, tá ið einki óheft eftirlit er, ella um rættindi hjá sjúklingum í psykiatriini eru rímilig og umboða livikor hjá borgarum, spyr MEGD í hoyringssvarinum.

MEGD fegnast um, at myndugleikarnir ynskja at betra rættindini hjá sjúklingum, sum eru innskrivaðir á Psykiatriska Deplinum, men vísir samstundis á, at fleiri atlit mugu takast í álvara, um hetta endamálið skal røkkast.

- Broytingarnar í psykiatrilógini eiga at gerast eftir eini skipaðari tilgongd saman við sivilsamfelagnum, so rættindi eftir lógini við vissu kunnu gagnnýtast á rímiligan og fullgóðan hátt í føroyskum høpi, sigur MEGD.