Landalingin í Kina riggar væl

Landalistøðin, sum liggur nærhendis Shanghai, fyllir eitt øki, sum er til støddar sum seks fótbóltsvallir, og alingin fer fram í fleiri stigum.

Í fyrsta umfari verður bygt til 4.000 tons og síðani til 8.000 tons, men samanlagt er pláss fyri at ala 20.000 tons av laksi á økinum, Nordic Aqua Partners hevur til taks.

Ragnar Joensen var fyrst nevndarformaður, men er nú stjóri fyri stóru royndini við landaling í Kina, ið hann letur væl at.

– Fiskurin hevur gingið í kørunum í gott og væl eitt ár, og so hvørt sum hann veksur, verður hann fluttur í størri og størri kør, sigur hann.

– Landalingin er dýrari enn havaling, men afturfyri er tað lættari at stýra viðurskiftum sum sjúku og lús.

Hóast tað krevur nógv pláss at ala á landi, so heldur Ragnar Joensen tað avgjørt verða møguligt at hava landaling í Føroyum.