Skilir væl at fólk undrast

Fyri at økja um haldførið í búskapinum, hava tingfólk hækkað pensjónsaldurin hjá føroyingum eitt ár, meðan serfrøðingar halda, at hann skal hækkast enn meira.

Men hesum sleppa tingfólk undan, tí tey kunnu fáa fulla pensjón, 25.725 krónur um mánaðin, tá tey eru 60 ár og so leingi, tey liva.

Tað skrivar Sosialurin, sum mælir til, at løgtingsfólk eisini áttu at hækkað sín egna pensjónsaldur.

Nógv av tingfólkunum fara longu sum 60 ára gomul heim við fullari pensjón, sum er væl hægri enn hjá teimum flestu, sum mugu bíða til tey eru 67 ára gomul, og sum frá líður fara at vera eldri enn tað.

Í oddagreinini í Sosialinum verður víst á, at løgtingsfólk hava heimsins bestu pensjónsskipan, og at fólkið rindar hana.

Greinskrivarin vísir á, at eingin politikari hevur nevnt tað við einum orði, at politikarar “mugu ganga undan sum fyrimynd og hækka egnan pensjónsaldur”.