Vænta gos í Grindavík

Ógvusligir jarðskjálvtar eru í løtuni á Reykjanesi í Íslandi, og í gjárkvøldið valdu myndugleikarnir at flyta teir gott 3.000 íbúgvarnar burtur úr Grindavík.

Sambært íslendsku myndugleikunum so er ein gosriva beint undir Grindavík, og væntast kann, at hon fer at goysa, sigur Bergur Hermans Bergsson frá íslendska veðurstovninum.

Fyri at binda um heilan fingur hava myndugleikarnir eisini valt at flyta tilbúgvingarfólkini burtur úr økinum.

Einans fá løgreglufólk, sum hava til uppgávu at forða fyri, at fólk koma inn í bygdina, eru til staðar í løtuni.

Kenda ferðavinnustaðið Bláa Lónið er latið aftur, men enn er flogvøllurin í Keflavík opin.