Sjálvstýri útihýsir fimm limum

Eini 20 fólk vóru møtt á eykalandsfundinum hjá Sjálvstýri í skúlanum í Lamba fyrrapartin, har heitasta málið var avgerðin hjá landsnevndini um at blaka fimm menn úr flokkinum.

- Landsfundurin tók greitt undir við, at hesir fimm limirnir verða strikaðir, segði formaðurin í Sjálvstýri, Sámal Petur í Grund, tá ið Krista Johnsdóttir Kreutzmann hitti hann á døgurða.

Teir fimm fóru ímóti floksleiðsluni, tá ið teir bóðu Løgmálaráðið um at fáa innsavnaðu undirskriftirnar, ið vóru sendar ráðnum til góðkenningar í sambandi við uppstilling hjá flokkinum.

Miðlar onga atgongd
Floksleiðslan hevur heimild at strika limir, men hóast tann avgerðin fekk gildi alt fyri eitt, skuldi hon góðkennast á eykalandsfund, áðrenn hon endaliga kundi fáa gildi.

Tann 1. novembur læt Sjálvstýri Løgmálaráðnum tilsamans 814 undirskriftir, og av teimum eru tær 804 góðkendar, so flokkurin sleppur at stilla upp til komandi løgtingsval.

Á fundinum í Lamba fyrrapartin fingu fjølmiðlar ikki atgongd, og eingin av teimum fimm, ið vórðu tveittir úr flokkinum, var heldur til staðar á eykalandsfundinum.