Kongavarði samtyktur

Felagið, sum ætlar at byggja íbúðirnar, fær 6.700 fermetrar frá Tórshavnar kommunu aðrastaðni fyri 3.800 fermetrar undir Kongavarða.

Har skulu so tær 48 íbúðirnar, sum ikki verða bygdar undir Kongavarða, byggjast. Tórshavnar kommuna eigur 6.700 fermetrar millum Horna í Havn.

Uppskot tikið aftur

Uppskotið um serstaka byggisamtykt fyri økið undir Kongavarða er eisini tikið aftur. Alt hetta samtykti Tórshavnar býráð í gjárkvøldið.

Minnilutin í býráðnum heldur ikki, at makaskiftið skal gerast soleiðis sum meirilutin ætlar. Kommunalt makaskifti eigur at gerast eftir marknaðartreytunum. 

Kommunalt lendi eigur at verða selt sambært teimum treytum, sum eru galdandi á marknaðinum, heldur minnilutin.

 >> SÍ EISINI Helvtina færri íbúðir

Skal slíkt makaskifti gerast, krevst loyvi frá landsstýrinum. Sambært kunngerð skal fastogn hjá kommununi bjóðast út alment, áðrenn selt verður.

Men víkjast kann frá hesum kravi í sambandi við makaskifti, og tá tað annars eru serlig viðurskifti, sum tala fyri, at fastognin kann verða seld uttan alment útboð.

Meirilutin í býráðnum hevur samtykt makaskiftið treytað av, at allar góðkenningar fáast.