Sjey kommunur lækka skattin

Hóast inntøkurnar hjá kommununum vórðu størri enn mett í fjør, hava bara sjey av 29 kommunum lækkað skattaprosentið í ár.

Eingin kommuna hevur hækkað skattaprosentið.

Hjá teimum flestu er lækkingin lítil, minni enn eitt prosentstig.

Í Fámjins kommunu er skattaprosentið tó lækkað úr 19 niður í 16 prosent, sum er tað minsta, sum er loyvt.

Barnafrádrátturin er størri enn í fjør í fimm kommunum og minni í einari.

Størsti barnafrádráttur er 10.000 kr., og tann minsti er 5.000 kr.

Hægsta kommunuskattaprosent í ár er 22. Tað lægsta er 16.

Miðalskattaprosentið í ár er 20,19. Tað var 20,24 í fjør.